Na Asha Mwakyonde, DODOMA
CHUO Kikuu cha Dodoma (UDOM), kimeingia makubaliano ya kimkakati na Tume ya Taifa ya TEHAMA kuanzisha kituo cha ubunifu wa kidijitali kampusini ambacho kinatarajiwa kukamilika ndani ya miezi sita ijayo na kazi za maandalizi zimeanza tayari.
Hayo ameyasema leo Juni 18,2025 na Makamu Mkuu cha UDOM Profesa Lughano Kusiluka katika hafla ya kuwapokea na kuwapongeza wanafunzi wa chuo hicho waliowakilisha Tanzania katika Mashindano ya Huawei ICT 2025 yaliyofanyika Shenzhen, China — mji unaotambulika duniani kama kitovu cha ubunifu wa teknolojia.
Amesema hiyo inaashiria hatua muhimu katika jitihada zao za kuweka UDOM kama kituo cha ubora katika TEHAMA huku akisema Kituo hicho kitahakikisha kinakuza ubunifu, utafiti na uendelezaji wa biashara kwa vijana wa Kitanzania.
Makamu Mkuu huyo ameeleza kuwa kutokana na utendaji wa hali ya juu wa UDOM katika mambo yanayohusiana na TEHAMA, Wizara ya Mawasiliano na Teknolojia ya Habari imeahidi kusaidia maabara ya usalama mtandaoni ya chuo hicho, ambapo wanafunzi wanapata mafunzo ya usalama wa kidijitali.
"Hivi karibuni, UDOM ilizindua programu maalum ya usalama mtandaoni, iliyolenga kuwapa wanafunzi ujuzi wa kiufundi wa kugundua, kuzuia, na kupunguza uhalifu mtandaoni," amesema.
Amefafanua kuwa Programu hiyo inaleta cheti kinachotambulika kimataifa katika usalama mtandaoni na kwamba hayo sio mafanikio madogo.
Prof. Kusiluka amesema wale waliomaliza kwa mafanikio wana uwezo wa kufanya kazi mahali popote duniani na kwamba hivi sasa, hakuna chuo kikuu kingine katika Afrika ya Kati au Afrika Subsahara lenye cheo kama hicho.
Naye Mkurugenzi Mtendaji wa Kitivo cha Sayansi ya Habari na Elimu ya Mtandaoni, Dr Florence Rashid amesema kwamba Mashindano ya Huawei ICT 2025 yalihusisha wanafunzi zaidi ya 960,000 kutoka vyuo vikuu na vyuo vikuu vya wastaafu zaidi ya 2,000 katika nchi na mikoa 100.
Akizungumzia ushiriki wa wanafunzi hao amesema kuwa mataifa 48 yalifikia fainali za kimataifa, yalioshiriki na timu 179 ambapo utendaji mkubwa wa Tanzania katika fainali, unaonyesha ubora wa elimu na mafunzo ya TEHAMA yanayotolewa na UDOM.
0 Comments